EBANGHELYO (Lukas 21:5-19)

1Dihay pipila kanila nga naghisgot bahin sa Templo nga gidayandayanan sa maanindot nga mga bato, ug sa mga gasa nga gihalad ngadto sa Dios. Unya miingon si Jesus, 6"Kining tanan nakita ninyo - apan moabot ang panahon nga walay bisan usa ka bato nga magpabilin sa nahimutangan niini; ang tanan tumpagon gayod."

7"Magtutudlo," nangutana sila, "Kanus-a ba kini mahitabo? Ug unsa man ang ilhanan nga magpaila nga moabot na ang panahon nga kini matuman?"

8Si Jesus miingon, 'Pagbantay kamo ug ayaw kamo palimbong; kay daghan ang moanhi sa akong ngalan nga mag-ingon, 'Ako mao ang Cristo!' ug moingon usab, 'Miabot na ang panahon!' Apan ayaw sila tuohi. 9Ayaw kamo kahadlok kon makadungog kamog mga gubat ug mga kagubot; kay kining mga butanga kinahanglan nga mahitabo gayod pag-una, apan wala kini magpasabut nga duol na ang katapusan."

10Mipadayon siya pag- ingon, "Ang usa ka nasod makiggubat sa laing nasod, ug ang usa ka gingharian mosulong sa laing gingharian. 11Mahitabo unya ang makalilisang nga mga linog, gutom, ug kamatay sa tanang dapit, ingon man ang makahahadlok nga mga butang ug mga dagkong ilhanan gikan sa langit."

12"Apan sa dili pa mahitabo kining mga butanga, dakpon kamo ug lutoson; taralon kamo ngadto sa mga sinagoga ug bilanggoon, ug dad-on kamo atubangan sa mga hari ug sa mga punoan tungod kanako. 13Mao unya kini ang higayon nga makasangyaw kamo sa Maayong Balita. 14Sa dili pa kini mahitabo, usaha ang inyong hunahuna nga dili kamo mabalaka kon unsaon ninyo pagpanalipod sa inyong kaugalingon; 15kay hatagan kamog igsusulti ug kaalam nga walay usa sa inyong mga kaaway nga makatubag o makapanghimakak. 16Budhian kamo bisan gani sa inyong mga ginikanan ug mga igsuon, ingon man sa inyong mga paryenti ug mga higala; ug patyon nila ang pipila kaninyo. 17Magdumot kaninyo ang tanan tungod kanako, 18apan walay bisan usa ka buhok sa inyong ulo nga mawala. 19Pabilin kamo nga malig-on kay niining paagiha maluwas kamo." Ang Ebanghelyo sa Ginoo.

oOo

KAHULOGAN SA EBANGHELYO (Lukas 21:5-19)

5aDihay pipila kanila nga naghisgot bahin sa Templo nga gidayandayanan sa maanindot nga mga bato, ug sa mga gasa nga gihalad ngadto sa Dios.

Sa panahon ni Jesus, ang Templo sa Jerusalem, giisip nga usa ka kahibulongang edipisyo, bag-ong natukod. Gisugdan kini sa pagtukod ni Herod sa tuig 19 B.C.
Sama sa kadaghanan sa mga tawo, ang mga tinun-an ni Jesus nakadayeg usab sa kaanindot sa Templo ug sa kamahal sa mga dayandayan niini..

5bUnya miingon si Jesus, 6"Kining tanan nakita ninyo - apan moabot ang panahon
nga walay bisan usa ka bato nga magpabilin sa nahimutangan niini; ang tanan tumpagon gayod."

Atong matagna ang kahikurat sa mga katawhan sa ilang napaminaw sumala sa sulti ni Jesus. Gani usa kini sa mga pasangil nga gilabay batok kang Jesus sulod sa korte sa Sanhedrin (Mateo 26:61).

Inay nga si Jesus moduyog sa mga pagdayeg sa kaanindot sa Templo, mibahan hinoon siya kabahin sa umaabot nga pagkatumpag niini. Mipahinumdum si Jesus sa pagkalumalabay sa tanang butang niining kalibutana. Busa dili unta himoon tinubdan sa kasigurohan o sekuridad ang mga butang nga materyal.

7"Magtutudlo," nangutana sila, "Kanus-a ba kini mahitabo? Ug unsa man ang ilhanan nga magpaila nga moabot na ang panahon nga kini matuman?"

Mao kini ang kanunay nga gipangutana gikan kanatong mga tawo. Buot kita nga masayod kon anus-a.

8Si Jesus miingon, 'Pagbantay kamo ug ayaw kamo palimbong; kay daghan ang moanhi sa akong ngalan nga mag-ingon, 'Ako mao ang Cristo!' ug moingon usab, 'Miabot na ang panahon!' Apan ayaw sila tuohi.

Ang tanang gipatuo sa daghang mga "sekta" nga nasayran na nila kon anus-a mahitabo ang ika-duhang pag-abot ni Cristo gibunggo niining maong usa ka pahayag ni Jesus.

Ang mahinungdanon mao ang pagpuyo sa "matag adlaw" isip pagpangandam sa ika-duhang pag-anhi ni Cristo, bisan pa kon wala kita masayod kon anus-a kini mahitabo.

Gipasidan-an kita sa mga mini nga mga propeta nga makahatag lamang og dugang kalibog. Busa magbantay kita aron dili kita mahisalaag!

9Ayaw kamo kahadlok kon makadungog kamog mga gubat ug mga kagubot; kay kining mga butanga kinahanglan nga mahitabo gayod pag-una, apan wala kini magpasabut nga duol na ang katapusan." 10Mipadayon siya pag- ingon, "Ang usa ka nasod makiggubat sa laing nasod, ug ang usa ka gingharian mosulong sa laing gingharian. 11Mahitabo unya ang makalilisang nga mga linog, gutom, ug kamatay sa tanang dapit, ingon man ang makahahadlok nga mga butang ug mga dagkong ilhanan gikan sa langit."

Human sa pasidaan batok sa mga propetang bakakon, si Jesus mipasipot sa iyang ikaduhang kahingawa: nga dili unta kita magpadaog sa kahadlok nga nagagikan sa mga gubat ug kagubot; linog, gutom ug kamatay; ug mga tilimad-on gikan sa kalangitan.

Dili angay ikahadlok tungod kay ang Dios maoy magbubuot sa kasaysayan. Uban sa maong pagtuo, kita magbaton hinoon og taas nga pailob taliwala sa mga makahadlok nga panghitabo.

Moabot ra gayod ang panahon nga matuman ang mga gipamahayag ni Jesus!

Ang maong mga makalilisang nga panghitabo makapapukaw usab sa hiyas sa paglaum. Bisan unsa, anaay Ginoo nga atong kasaligan!

12"Apan sa dili pa mahitabo kining mga butanga, dakpon kamo ug lutoson; taralon kamo ngadto sa mga sinagoga ug bilanggoon, ug dad-on kamo atubangan sa mga hari ug sa mga punoan tungod kanako. 13Mao unya kini ang higayon nga makasangyaw kamo sa Maayong Balita.

Ang pagkawagtang sa pagtuo sa iyang mga tinun-an maoy dakong gikahadlokan ni Jesus. Ang mga pagpanglutos batok sa mga tinun-an mahitabo sulod sa madali nga panahon. Apan mipatataw si Jesus nga kon barogan nila ang pagtuo mao usab kini ang talagsaong kahigayonan nga sila makasangyaw ug makasaksi sa Maayong Balita.

14Sa dili pa kini mahitabo, usaha ang inyong hunahuna nga dili kamo mabalaka kon unsaon ninyo pagpanalipod sa inyong kaugalingon; 15kay hatagan kamog igsusulti ug kaalam nga walay usa sa inyong mga kaaway nga makatubag o makapanghimakak. 16Budhian kamo bisan gani sa inyong mga ginikanan ug mga igsuon, ingon man sa inyong mga paryenti ug mga higala; ug patyon nila ang pipila kaninyo. 17Magdumot kaninyo ang tanan tungod kanako, 18apan walay bisan usa ka buhok sa inyong ulo nga mawala. 19Pabilin kamo nga malig-on kay niining paagiha maluwas kamo."

Paglaum… Pailob… Kalig-on, bisag unsa may mga mahitabo!

Kining Balaang Mensahe, ang kamatuoran nga dili masabtan sa tawhanong kaalam, apan mahimong atong tuohan!

Kining maong Mensahe dili nato isipon sa iyang materyal nga kahulogan kay daghan gayod sa mga Kristyanos ang napukan. Ang pagtuo dili makapalikay kanato sa kalisod ug kamatayon, apan makapatultol kini sa tinuod nga Kinabuhi!

Ginoo, dugangi ang among pagtuo!