1Si Jesus miingon ngadto sa iyang mga tinun-an, "Dihay usa ka dato nga may piniyalan, ug gisuginlan siya nga giusik-usikan lamang sa iyang piniyalan ang iyang salapi. 2Busa iyang gitawag ang piniyalan ug giingnan, 'Unsa man kining akong nadungog mahitungod kanimo? Hatagi akog hingpit nga husay sa imong pagdumala sa akong katigayonan, kay sukad karon dili ka na akong piniyalan.' 3Busa nagkanayon sa iyang kaugalingon ang piniyalan, 'Papahawaon na man ako sa akong agalon, unsa na may buhaton ko? Dili ako makahimo sa pagpangalot og kanal ug maulaw usab ako sa pagpakilimos. 4Ah, kini ang akong buhaton aron kon papahawaon na ako sa akong trabaho, may mga higala unya ako nga mopasaka kanako sa ilang balay.' 5Busa iyang gitawag ang tanan nga utangan sa iyang agalon. Ang una iyang gipangutana, 'Pila bay utang nimo sa akong agalon?' 6'Usa ka gatos ka taro nga lana.' mitubag ang tawo. 'Ania ang imong bali. Lingkod ug kalim-an lang ang isulat,' matod sa piniyalan. 7Ug giingnan niya ang usa, 'Ug ikaw, pila may imong utang?' 'Usa ka libo ka bakid nga trigo,' mitubag ang tawo. 'Ania ang imong bali; walo ka gatos lang ang isulat,' miingon ang piniyalan. 8Ang agalon niining tikasan nga piniyalan midayeg kaniya tungod sa iyang inantigo nga buhat; kay ang mga tawo niining kalibutana mas maantigo modumala sa mga buluhaton kay sa mga tawo nga iya sa kahayag." 9Ug si Jesus mipadayon sa pag-ingon, "Busa sultihan ko kamo: pagbaton kamog mga higala pinaagi sa mga bahandi niining kalibutana aron inigkahurot na niini dawaton kamo didto sa walay katapusang puloy-anan. 10Kinsa kadtong kasaligan sa gagmayng butang kasaligan usab sa dagko; ug kinsa kadtong limbongan sa gagmayng mga butang limbongan usab sa dako. 11Busa kon kamo dili kasaligan sa inyong paggamit sa bahandi ning kalibutana, kinsay mopiyal kaninyo sa tinuod nga bahandi? 12Ug kon dili kamo kasaligan sa mga butang sa uban, kinsay mohatag kaninyo sa inyong kaugalingong mga butang?" 13"Walay tawo nga mahimong ulipon sa duha ka agalon kay mahitabo gayod nga iyang dumtan ang usa ug ang usa iyang higugmaon; o unongan niya ang usa ug ang usa iyang tamayon. Dili kamo makapaulipon sa Dios ug sa salapi." Ang Ebanghelyo sa Ginoo.

oOo

KAHULOGAN SA EBANGHELYO (Lukas 16:1-13)

1aSi Jesus miingon ngadto sa iyang mga tinun-an,
Usa kini ka sambingay nga gitawag og "mashal" o sa ato pa, tanghaga o tigmo. Bisan tuod daw makapahikurat ang saysay sa maong sambingay, apan ang pagtulun-an niini lawom ug bililhon.

1b"Dihay usa ka dato nga may piniyalan, ug gisuginlan siya nga giusik-usikan lamang sa iyang piniyalan ang iyang salapi.

Usa ka piniyalan nga nag-usik sa katigayonan! Ang tibuok sambingay naghisgot bahin sa pagka-sinalikway. Sa Romanhon nga pamalaod ang butang nga gipanag-iya nag-agad sa tag-iya niini. Ang tag-iya may katungod sa paghimo sa bisan unsa niini: "Kay akoa man kini ako usab ang magbuot kon unsaon ko kini." Apan sa hunahunang Kristohanon- ang tawo dili maoy tinuod nga tag-iya, apan "piniyalan" lamang. Mao usab kini ang gitudlo sa dokumento sa Batikano II (cf. Church in the Modern World, 69).

2Busa iyang gitawag ang piniyalan ug giingnan, 'Unsa man kining akong nadungog mahitungod kanimo? Hatagi akog hingpit nga husay… kay sukad karon dili ka na akong piniyalan.'

Ang tanan nga akong gipanag-iya, akong mga mithi, akong kaalam, akong katigayonang moral ug espirituwal, akong kahimanan-kining tanan gitunol kanako isip "piniyalan". Walay akoy katungod sa pag-usik-usik niini kay gipanag-iya man kini sa Ginoo kinsa misalig kanako.

3Busa nagkanayon sa iyang kaugalingon ang piniyalan, 'Papahawaon na man ako sa akong agalon, …Dili ako makahimo sa pagpangalot og kanal ug maulaw usab ako sa pagpakilimos. 4Ah, kini ang akong buhaton aron kon papahawaon na ako… may mga higala unya ako nga mopasaka kanako sa ilang balay.'

Kining panag-istorya ngadto sa kaugalingon tatawng nagpakita sa dakong suliran nga iyang giatubang. Kinahanglan nga iya kining dalion sa pagsulbad. Karon dayon kay kon maugmaan pa tingali og ulahi na! Kinahanglan nga may panagang siya kon ugaling siya papahawaon.

Mao usab kini ang gikinahanglan alang sa pagkab-ot sa Gingharian sa Dios. Usa ka dinalian nga tahas. Ug kini baya ang tinuod nga tumong sa matag usa kanato!

5Busa iyang gitawag ang tanan nga utangan sa iyang agalon. Ang una… 'Pila bay utang nimo sa akong agalon?' 6'Usa ka gatos ka taro nga lana.' ... 'Ania ang imong bali… kalim-an lang ang isulat,'...7Ug giingnan niya ang usa, 'Ug ikaw, pila may imong utang?' 'Usa ka libo ka bakid nga trigo,'… 'Ania ang imong bali; walo ka gatos lang ang isulat,'…

Kining maong panikas maisip nga inantigo sa tulo ka mga paagi: una, walay salapi nga mausik (it costs nothing), ika-duha, walay magpabilin nga ilhanan (leaves no traces), ug luwas kini sa kapeligro nga masakpan (safe from eventual discovery).
Hangtod niining panahona, ang mga naminaw nagpaabot nga si Jesus mopakanaog og pagsaway niini. Atong paminawon kon unsay iyang sumpay...

8Ang agalon niining tikasan nga piniyalan midayeg kaniya tungod sa iyang inantigo nga buhat; kay ang mga tawo niining kalibutana mas maantigo modumala sa mga buluhaton kay sa mga tawo nga iya sa kahayag."

Mahibulong gayod kita nga si Jesus midayeg sa tikasan nga piniyalan. Masabtan ra nato sa dili madugay. Si Jesus mismo mao ang mohatag og katin-awan.

Apan kinahanglan nga atong mahibaloan nga si Jesus wala gayod mouyon sa panikas sa limbongang piniyalan. Kay sa hunahuna ni Jesus ang panikas kaanib gayod sa "kangitngit" nga si Satanas maoy pangulo (tan-awa sa Juan 12:31). Ang mga "anak sa kahayag" kinahanglan gayod nga mopalayo niadtong mga tikasan (1 Tessalonica 5:4-5).

9..."Busa sultihan ko kamo: pagbaton kamog mga higala pinaagi sa mga bahandi niining kalibutana aron inigkahurot na niini dawaton kamo didto sa walay katapusang puloy-anan.

Pagbaton og higala: mao kini ang hinungdan sa pagdayeg. Dinhi gitug-an ni Jesus ang mahinungdanong mensahe: ang maayong paggamit sa katigayonan alang sa uban. Ang katigayonan dili maot sa ilang pagkasila. Mahimo nga gamiton kini aron makabaton og dugang nga mga higala.

10Kinsa kadtong kasaligan sa gagmayng butang kasaligan usab sa dagko...

Ang salapi diay dili gayod ikatandi sa tinuod nga katigayonan, ang Ginghariang walay katapusan. Bililhon man ang salapi apan anhi ra gayong kalibutana!

11Busa kon kamo dili kasaligan sa inyong paggamit sa bahandi ning kalibutana, kinsay mopiyal kaninyo sa tinuod nga bahandi?...

Ang katigayonan mahimo nga taytayan sa pagsulod sa Gingharian kon kini gigamit sa matarong nga paagi!

13"Walay tawo nga mahimong ulipon sa duha ka agalon kay mahitabo gayod nga iyang dumtan ang usa ug ang usa iyang higugmaon… Dili kamo makapaulipon sa Dios ug sa salapi."

Atong dawaton nga kon kita pa lay pahukmon buot natong angkonon ang duha: Dios ug salapi. Apan usa ra gayod ang atong pili-on! Unsa kaha ang atong pilion? Ang salapi ba ang atong diosdios? O ang matuod nga Dios?