Ika-13 nga Domingo sa Tuig (B)
Hunyo 28, 2009

EBANGHELYO (Markos 5:21-43 o Markos 5:21-24, 35-43)

21Unya mibalik si Jesus pagtabok sa lanaw ug didto may dakong panon sa katawhan nga mialirong kaniya. 22Ug miabot ang usa ka pangulo sa sinagoga niadtong dapita nga ginganlag Jairo. 23Sa pagkakita niya kang Jesus, mihapa siya sa iyang tiilan, ug nagpakiluoy pag-ayo nga nag-ingon, "Ang akong gamayng anak nga babaye nasakit ug naglisod na. Adtoa intawon siya ug hikapa aron mamaayo."

24Ug mikuyog si Jesus kaniya. Daghan kaayong mga tawo miuban kaniya ug tungod niini nagdasok sila libot kaniya. 35Samtang nagsulti si Jesus niini, may mga sinugo nga miabot gikan sa balay ni Jairo ug miingon kaniya, "Patay na ang imong anak, busa nganong imo pang samokon ang Magtutudlo?" 36Wala tagda ni Jesus ang ilang gisulti kaniya; giingnan hinuon niya si Jairo, "Ayaw kahadlok; salig lang."

37Unya wala siyay laing gitugotan pagkuyog kaniya gawas kang Pedro ug sa magsoon nga si Santiago ug si Juan. 38Pag-abot nila sa balay ni Jairo, nakita ni Jesus ang kaguliyang ug nabati niya ang kusog nga hinilakay ug pagminatay.

39Midayon siya sa balay ug miingon kanila, "Ngano bang nagkaguliyang ug naghilak man kamo? Wala mamatay ang bata; natulog lamang siya!" 40Unya gipagula ni Jesus ang mga tawo tungod kay nagbugalbugal man sila kaniya. Ug gidala niya ang amahan ug inahan sa bata ug ang tulo niya ka tinun-an ngadto sa kuwarto nga gihigdaan sa bata. 41Ug iyang gikuptan ang kamot sa bata ug giingnan, "Talita kumi!" nga sa ato pa, "Inday, bangon!" 42Dihadiha ang bata nga nagpanuigon og napulog-duha ka tuig mibangon ug milakaw. Ug hilabihan gayod ang ilang kahibulong sa nahitabo! 43Apan gipinahan sila ni Jesus sa dili pagsugilon kang bisan kinsa mahitungod niini, ug siya miingon, "Pakan-a ninyo ang bata." Ang Ebanghelyo sa Ginoo.

oOo

KAHULOGAN SA EBANGHELY0 (Markos 5:21-24, 35-43)

21Unya mibalik si Jesus pagtabok sa lanaw ug didto may dakong panon sa katawhan nga mialirong kaniya. 22Ug miabot ang usa ka pangulo sa sinagoga niadtong dapita nga ginganlag Jairo. 23Sa pagkakita niya kang Jesus, mihapa siya sa iyang tiilan, ug nagpakiluoy pag-ayo nga nag-ingon, "Ang akong gamayng anak nga babaye nasakit ug naglisod na. Adtoa intawon siya ug hikapa aron mamaayo."

24Ug mikuyog si Jesus kaniya. Daghan kaayong mga tawo miuban kaniya ug tungod niini nagdasok sila libot kaniya.

Duha ka mga panghitabo nga angayan nato hatagan. Si Jairo nga nagpakiluoy… Si Jesus nga mingkuyog kaniya. Silang duha nagkuyog...

35Samtang nagsulti si Jesus niini, may mga sinugo nga miabot gikan sa balay ni Jairo ug miingon kaniya, "Patay na ang imong anak, busa nganong imo pang samokon ang Magtutudlo?" 36Wala tagda ni Jesus ang ilang gisulti kaniya; giingnan hinuon niya si Jairo, "Ayaw kahadlok; salig lang."

Oo, alang kang Jesus ang labing mahinungdanon mao ang pagtuo. Ang pagtuo mao ang labing kinahanglan nga manaa kang Jairo.

37Unya wala siyay laing gitugotan pagkuyog kaniya gawas kang Pedro ug sa magsoon nga si Santiago ug si Juan.

Sa makausa pa, gilikayan ni Jesus ang pagkaguliyang sa daghang mga tawo.

Niining hitaboa tulo lamang ka mga tawo, mga saksi, nga maoy iyang gihatagan nga makakita sa iyang pagahimoon. Mao usab sila ang mga saksi sa Transfiguration o bagkabalhin sa iyang panagway (Markos 9:2) ug sa iyang Agony o sa kasakitan sa harden (Markos 14:33). Si Jesus dili buot nga pagaisipon ang iyang gahum nga usa lamang ka magic.

38Pag-abot nila sa balay ni Jairo, nakita ni Jesus ang kaguliyang ug nabati niya ang kusog nga hinilakay ug pagminatay. 39Midayon siya sa balay ug miingon kanila, "Ngano bang nagkaguliyang ug naghilak man kamo? Wala mamatay ang bata; natulog lamang siya!"

Ang pagtuo nila ni Jairo ug mga kaubang tulo ka mga apostoles gisulay pag-ayo taliwala sa mga katawhan nga walay pagtuo. Gani ang mga katawhan nagkatawa lamang sa pamahayag ni Jesus.

40Unya gipagula ni Jesus ang mga tawo tungod kay nagbugalbugal man sila kaniya. Ug gidala niya ang amahan ug inahan sa bata ug ang tulo niya ka tinun-an ngadto sa kuwarto nga gihigdaan sa bata.

Ang mga kamot ni Jesus nga naghimog katingalahang butang. Mikubot sa laing kamot nga wala nay kinabuhi. Pagkakatingalahan…

Mao usab kini ang atong kasinatian diha sa pagkalawat: adunay kinabuhi nga moabot kanato.

41 Ug iyang gikuptan ang kamot sa bata ug giingnan, "Talita kumi!" nga sa ato pa, "Inday, bangon!"

Si Markos lamang ang mikutlo niini sa pinulongang Aramaic, ang sinulti-an ni Jesus.

Iya kining nakuha ni Pedro, nga usa sa mga saksi sa maong panghitabo.

Si Pedro dili makalimot niini isip usa ka kabahin sa iyang panumduman. Nahinumdum si Pedro niini sa panahon nga nahitabo ang Ressurrection o Pagkabanhaw ni Jesus.

Sa Griego egeire, usa ka pulong nga paskuwal, nga nagpunting sa Pagkabanhaw.

Kining maong pulong naghubit usab sa atong bunyag. Anaa ang "katulugon" tungod sa salang panulondon, apan anaa ang "pagmata" gumikan sa bunyag.

Anaa na kanako, isip binunyagan, ang kinabuhing dayon. Busa anaa ba "ang paghigmata" sa akong kinabuhi sa pagtuo?

42Dihadiha ang bata nga nagpanuigon ug napulog-duha ka tuig mibangon ug milakaw. Ug hilabihan gayod ang ilang kahibulong sa nahitabo! 43Apan gipinahan sila ni Jesus sa dili pagsugilon kang bisan kinsa mahitungod niini, ug siya miingon, "Pakan-a ninyo ang bata."

Walay laing padungan sa panghitabo kondili mao gayod ang kahibulong! Labi na ang sugyot ni Jesus nga kinahanglang maghilom sila sa unsay ilang nasaksihan. Kini nagpasabot lamang nga ang mga misteryoso nga gibuhat ni Jesukristo dili gayod matugkad niadtong mga walay igong pagtuo.

Iyang gipakaon ang bata… dako ang kahulogan niini nga ang nabunyagan moadto usab sa mas taas pang altar sa pagkalawat. Ang tawo nga nagalawig gikan sa kamatayon ngadto sa kinabuhi kinahanglan nga modawat sa sakramento sa pagkalawat.

Ang duha ka mga sakramento sa bunyag ug pagkalawat may kadugtungan. Pagkamisteryoso gayod…..